Sanggeus Olimpiadeu lekasan, masarakat Indonesia kiwari bisa lalajo PON ka-18 di Riau. Tiap propinsi ngirimkeun wawakil padungdung tarung pikeun kaunggulan daerahna. Kitu ari atlit mah. Niat awalna ge seja nembongkeun pangabisa sangkan meunang medali.
Nu kudu dicaritakeun mah nu ngarurus PON, ih da, matak ateul peureup. Moal ari disebut teu becus ngurus mah, da buktina PON tetep lumangsung. Ngan perkara tempat kagiatan nu can beres, kapanan jadi carita goreng. Salah atlit? Saha nu wani ngacung? Nu ngarurusna tangtuna oge!
Heueuh meureun, matak olahraga di Indonesia atung eneh-atung eneh oge, da diarurus ku nu teu becus. Ngadon ngeusian pesak tina ladang nyieun tempat kagiatan. Nuduh? Ah, bandungan we da geuning tempat kagiatan PON teh kapanan loba nu can beres.
Asa ku lucu pamikiran nu ngarurus eta PON. Sigana teu apaleun yen PON teh baheula mah pikeun ngalawan Walanda dina raraga mertahankeun kamerdekaan. Masagikeun sumanget sangkan Walanda teu ngajajah deui. Naha ayeuna alesanana PON teh ngalawan koruptor? Euweuh kaera ari kitu mah, maenya koruptor ngalawan atlit PON! Wani kitu diadu?
